ગાંધીનગર : ગુજરાતમાં રાજનીતિક રમત રમી ચુકેલા ધારાસભ્યો હવે ક્રિકેટની રમત પણ રમશે. હાલ સમગ્ર દેશમાં ક્રિકેટ ફિવર ચાલી રહ્યો છે. આઇપીએલ હોય કે ભારતીય ટીમની ઓસ્ટ્રેલિયા સામેની લીગ હોય લોકોને ખુબ જ રસ પડતો હોય છે. જો કે હવે ગુજરાત વિધાનસભામાં અનોખી પહેલ થવા જઇ રહી છે. ગુજરાતમાં હવે ધારાસભ્યો પણ ક્રિકેટ રમતા જોવા મળશે. ગુજરાતમાં સ્વર્ણિમ ગુજરાત MLA ક્રિકેટ લીગ 2022-23 ની શરૂઆત થવા જઇ રહી છે. તારીખ 20,27 અને 28 માર્ચ દરમિયાન આ ક્રિકેટનું આયોજન થશે.
કોબા ખાતેના એક ખાનગી સ્ટેડિયમમાં આયોજન
આ મેચનું આયોજન કોબા ખાતે આવેલા એક ખાનગી ક્રિકેટ સ્ટેડિયમ ખાતે મેચનું આયોજન થશે. આ મેચ 20 ઓવરની રહેશે. જેમાં બનાસ,તાપી, વિશ્વામિત્રી, ભાદર,સરસ્વતી,શેત્રુંજી, સાબરમતી, નર્મદા, મહીસાગર અને મીડિયા ટીમ બનાવવામાં આવી છે. જેનો પ્રથમ રાઉન્ડ 20-03-2023 ના દિવશે આયોજીત થશે. જેમાં બનાસની સામે વિશ્વામિત્રી ઉતરશે. આ મેચ સાંજે 7 વાગ્યે હશે. ત્યાર બાદ સાડા આઠ વાગ્યે તાપીની સામે ભાદર ઉતરશે. સરસ્વતીની સામે શેત્રુંજી 10 વાગ્યે ઉતરશે.
27 તારીખે કાર્યક્રમનું આયોજન
27 તારીખે મેચનો બીજો રાઉન્ડ હશે. જેમાં સવારે 7 વાગ્યે સાબરમતીની સામે નર્મદાની ટીમ ઉતારવામાં આવશે. ત્યાર બાદ પ્રથમ મેચની વિજેતા ટીમ મહિસાગરની સામે 8.30 વાગ્યે ઉતરશે. જ્યારે મીડિયાની ટીમ સામે બીજી મેચની વિજેતા ટીમ ઉતરશે.
28 તારીખે ફાઇનલ મેચ
28 તારીખે ફાઇનલ અને સેમીફાઇનલનું આયોજન થશે. જેમાં સેમી ફાઇનલમાં મેચ ત્રણની વિજેતા ટીમ અને ચોથી મેચની વિજેતા સાંજે સાત વાગ્યે સામસામે ઉતરશે. જ્યારે પાંચમી મેચ અને છઠ્ઠી મેચની વિજેતા ટીમ સાંજે 8.30 વાગ્યે આયોજીત થશે. ત્યાર બાદ સાતમી મેચની વિજેતા ટીમ અને આઠમી મેચની વિજેતા ટીમ સામસામે ફાઇનલ સ્વરૂપે ટકરાશે. સાંજે 10 વાગ્યે.
