‘આ ગામમાં દારૂ વેચતા કે પીતા પકડાયા તો પોલીસ કેસ કરાશે’, બોટાદ લઠ્ઠાકાંડ બાદ ગુજરાતના ગામનો વીડિયો વાઈરલ

શું છે વીડિયોમાં?
સોશિયલ મીડિયામાં વાઈરલ થયેલા આ વીડિયોમાં એક વ્યક્તિ ઢોલ લઈને ગામમાં જાહેરાત કરી રહ્યો છે કે દારૂના વેપારીએ ગામમાં દારૂ વેચવો નહીં અને દારૂના બંધાણી દારૂ પીવો નહીં. કોઈપણ દારૂ વેચનાર કે પીધેલો પકડાશે તો કાયદેસર પોલીસ કેસ કરવામાં આવશે.

હકીકતમાં બોટાદના બરવાળામાં ઝેરી દારૂ પીવાથી અનેક લોકોના મોત થયા હતા. જે બાદ કોંગ્રેસ તથા આમ આદમી પાર્ટીએ ભાજપ સરકારને ઘેરી હતી. બીજી તરફ આજે ગૃહમંત્રી હર્ષ સંઘવીએ આ મામલે કડક કાર્યવાહી કરી છે. જેમાં બોટાદના એસપી કરણરાજ વાઘેલા તથા અમદાવાદ ગ્રામ્ય એસપી વીરેન્દ્ર સિંહ યાદવની બદલી કરવામાં આવી છે, જ્યારે બોટાદ ડીવાયએસપી એસ.કે ત્રિવેદીને સસ્પેન્ડ કરવામાં આવ્યા છે. આ સાથે બરવાળા પીએસઆઇ ભગીરથસિંહ વાળા તથા રાણપુર પીએસઆઇ શૈલેન્દ્રસિંહ રાણાને સસ્પેન્ડ કરવામાં આવ્યા છે. આ ઉપરાંત પોલીસકર્મી સુરેશકુમાર ચૌધરીને પણ સસ્પેન્ડ કરાયા.