ડ્રગ્સ કેસમાં શાહરૂખ અને આર્યનની વધી શકે છે મુશ્કેલી, CBI કરી શકે છે પૂછપરછ

ડ્રગ્સ કેસમાં ખંડણીના આરોપોની તપાસ કરી રહેલી સીબીઆઈએ મે મહિનામાં જ સમીર વાનખેડેની આંશિક પૂછપરછ કરી હતી. જો કે, તપાસ એજન્સી તેની ઔપચારિક પૂછપરછ કરવા માટે કોર્ટના આદેશની રાહ જોઈ રહી છે. કારણ કે વાનખેડેને બોમ્બે હાઈકોર્ટ તરફથી 23 જૂન સુધી ધરપકડથી વચગાળાનું રક્ષણ મળ્યું છે. હવે વચગાળાની રાહતની મુદત પૂરી થવાની તારીખ નજીક છે ત્યારે તપાસ એજન્સી ફરી સક્રિય બની છે.

માંગ્યા હતા 25 કરોડ રૂપિયા?
સમીર વાનખેડે પર આરોપ છે કે તેણે ક્રૂઝ ડ્રગ્સ રેઇડ કેસમાં શાહરૂખ ખાનના પુત્ર આર્યન ખાનને છોડાવવા માટે 25 કરોડ રૂપિયાની માંગ કરી હતી. વાનખેડેની આ કથિત માંગ વચેટિયાઓ દ્વારા કરવામાં આવી હતી. આરોપ છે કે વચેટિયાએ માંગને લઈને શાહરૂખ ખાનની મેનેજર પૂજા દદલાનીનો સંપર્ક કર્યો હતો. આ કેસમાં આર્યન ખાનની પણ ધરપકડ કરવામાં આવી હતી, જો કે કોર્ટમાંથી જામીન મળ્યા બાદ 25 દિવસ બાદ તેને છોડી દેવામાં આવ્યો હતો.

એનસીબીના ડેપ્યુટી ડાયરેક્ટર જનરલ (ડીડીજી) જ્ઞાનેશ્વર સિંહની આગેવાની હેઠળની વિજિલન્સ તપાસના આધારે નોંધાયેલી એફઆઈઆરમાં આરોપ લગાવવામાં આવ્યો છે કે આર્યન ખાનને ડ્રગ્સના કેસમાં ફસાવવાના બદલામાં શાહરૂખ ખાન પાસેથી 25 કરોડ રૂપિયા પડાવવાનું કાવતરું ઘડવામાં આવ્યું હતું. બાદમાં 18 કરોડમાં ડીલ ફાઈનલ થઈ હતી. વચેટિયા ગોસાવી દ્વારા રૂ. 50 લાખની ટોકન રકમ પણ કથિત રીતે લેવામાં આવી હતી પરંતુ બાદમાં તેમાંથી થોડા લાખ રૂપિયા પરત કરવામાં આવ્યા હતા.

સમીર વાનખેડેની ટીમે ક્રુઝ પર દરોડો પાડ્યો હતો
2 ઓક્ટોબર 2021ના રોજ તત્કાલિન ઝોનલ ડાયરેક્ટર સમીર વાનખેડેના નેતૃત્વમાં NCPની ટીમ દ્વારા ક્રૂઝ પર દરોડો પાડવામાં આવ્યો હતો. શાહરૂખ ખાનનો પુત્ર આર્યન ખાન પણ ક્રૂઝ પર હાજર હતો. દરોડા બાદ એનસીબીની ટીમે આર્યન ખાનની ધરપકડ કરીને તેને જેલમાં મોકલી આપ્યો હતો. મામલો બોમ્બે હાઈકોર્ટમાં પહોંચ્યો હતો. જામીન અરજી પર સુનાવણી કરતી વખતે હાઇકોર્ટે એનસીબીની કાર્યવાહી અને તપાસ પર સવાલ ઉઠાવતા આર્યન ખાનને જામીન આપ્યા હતા.