વડાપ્રધાન મોદી, અમિત શાહ અને નીતિશ કુમારને મારી નાખવાની મળી ધમકી, દિલ્હી પોલીસને આવ્યા ફોન

આજે સવારે એક વ્યક્તિએ પીસીઆર પર બહારી જિલ્લાની પોલીસને ફોન કરી અને બિહારના મુખ્યમંત્રી નીતિશ કુમારને મારી નાખવાની ધમકી આપી. આ પછી તેણે ફરી ફોન કરીને પીએમ મોદી અને ગૃહમંત્રી અમિત શાહને મારી નાખવાની ધમકી આપી હતી. મીડિયા રિપોર્ટ્સ અનુસાર, આરોપી યુવકની ઓળખ સંજય વર્મા તરીકે થઈ છે અને તે દિલ્હીના માદીપુર વિસ્તારનો રહેવાસી છે. જણાવી દઈએ કે વડાપ્રધાન નરેન્દ્ર મોદી હાલ અમેરિકાના પ્રવાસે છે. કેન્દ્રીય ગૃહ પ્રધાન અમિત શાહને Z-કેટેગરીની સુરક્ષા છે, જ્યારે બિહારના સીએમ નીતિશ કુમારની સુરક્ષા SSG પાસે છે. પ્રોટોકોલ મુજબ તેને ઝેડ પ્લસ સુરક્ષા મળી છે.

એપ્રિલ મહિનામાં મોદીને મળી હતી ધમકી
આ વર્ષના એપ્રિલ મહિનામાં પોલીસે કેરળમાં ભાજપ કાર્યાલયમાં પીએમ મોદીને જાનથી મારી નાખવાની ધમકી આપતો પત્ર મોકલવા બદલ એક વ્યક્તિની ધરપકડ કરી હતી. આરોપીની 22 એપ્રિલે ધરપકડ કરવામાં આવી હતી. આરોપીનું નામ જેવિયર હોવાનું જણાવાયું હતું. પોલીસ તપાસમાં એવું પણ બહાર આવ્યું છે કે જેવિયરે તેના પાડોશીને ફસાવવા માટે આ પત્ર લખ્યો હતો.

ધમકી આપનારની ઓળખ થઈ ચૂકી
દિલ્હી પોલીસે જણાવ્યું કે ધમકી આપનાર યુવકની ઓળખ થઈ ગઈ છે અને તેનું નામ સંજય વર્મા છે. આ વ્યક્તિ દિલ્હીના માદીપુર વિસ્તારનો રહેવાસી છે. પરિવારજનોએ જણાવ્યું કે, સંજય ગત રાતથી દારૂ પી રહ્યો છે અને ઘરે આવ્યો નથી. સાથે જ પોલીસ તેને શોધી રહી છે. પોલીસનું કહેવું છે કે અમે તેની ટૂંક સમયમાં ધરપકડ કરીશું. તમને જણાવી દઈએ કે આ પહેલીવાર નથી જ્યારે કોઈ અજાણ્યા વ્યક્તિએ પીએમ મોદી અને સીએમને મારી નાખવાની ધમકી આપી હોય.