વિપક્ષના ‘INDIA’ ગઠબંધન પર બોલ્યા PM મોદી- ઈન્ડિયન મુજાહિદ્દીન અને ઈસ્ટ ઈન્ડિયામાં પણ ઈન્ડિયા

મોનસૂન સત્રમાં સંસદીય દળની આ પહેલી બેઠક હતી. આ બેઠક સંસદની લાયબ્રેરી બિલ્ડીંગમાં થઈ હતી. જેમાં વડાપ્રધાન નરેન્દ્ર મોદીની સાથે ગૃહમંત્રી અમિત શાહ, રક્ષા મંત્રી રાજનાથ સિંહ, ભાજપ અધ્યક્ષ જેપી નડ્ડા અને તમામ કેન્દ્રીય મંત્રીઓ હાજર રહ્યા હતા.

વાસ્તવમાં સંસદનું ચોમાસુ સત્ર ચાલી રહ્યું છે. પરંતુ મણિપુરની ઘટનાને લઈને હોબાળો મચી ગયો છે. વિપક્ષ પીએમ મોદીના નિવેદન અને સંસદમાં આ મુદ્દે વિસ્તૃત ચર્ચાની માંગ કરી રહ્યું છે. જ્યારે ગૃહમંત્રી અમિત શાહના જવાબ સાથે સરકાર ટૂંકા ગાળાની ચર્ચા માટે તૈયાર છે. પરંતુ વિપક્ષ આ મુદ્દે પીએમ મોદીના નિવેદન પર અડગ છે.

AAP સાંસદ સંજય સિંહ સસ્પેન્ડ
આ પહેલા સોમવારે મોનસૂન સત્રના ત્રીજા દિવસે પણ સંસદમાં મડાગાંઠ ચાલુ રહી હતી. જેના કારણે ગૃહની કાર્યવાહી ચાલી શકી ન હતી. દરમિયાન ગૃહમંત્રી અમિત શાહે સોમવારે વિપક્ષને મણિપુર મુદ્દે ચર્ચા શરૂ કરવાની અપીલ કરી હતી. બીજી તરફ, રાજ્યસભામાં હંગામાને કારણે AAP સાંસદ સંજય સિંહને સમગ્ર ચોમાસુ સત્ર માટે સસ્પેન્ડ કરવામાં આવ્યા હતા.

કોંગ્રેસે આરોપ લગાવ્યો કે વડાપ્રધાન સંસદમાં ચર્ચાથી ડરી રહ્યા છે, પરંતુ ભાજપે દાવો કર્યો હતો કે વિપક્ષ ભાગી રહ્યો છે કારણ કે તે ચોક્કસ તથ્યો બહાર આવે તેવું ઈચ્છતો નથી. મણિપુર મુદ્દે વિપક્ષી સભ્યોના વિરોધ દરમિયાન AAP સાંસદ સંજય સિંહને સસ્પેન્ડ કરવામાં આવ્યા હતા જ્યારે તેઓ ગૃહના વેલમાં પહોંચ્યા હતા અને સ્પીકર તરફ આંગળી ચીંધી હતી.

ગૃહના નેતા પીયૂષ ગોયલ સંજય સિંહને સસ્પેન્ડ કરવાનો પ્રસ્તાવ લાવ્યા હતા. તે ધ્વનિ મતથી પસાર થયો. પીયૂષ ગોયલે કહ્યું કે, સંજય સિંહની આ પ્રકારની કાર્યવાહી યોગ્ય નથી. આ ગૃહના નિયમોની વિરુદ્ધ છે. તેમણે કહ્યું કે, હું અધ્યક્ષને સંજય સિંહ વિરુદ્ધ કાર્યવાહી કરવાની અપીલ કરું છું. તેમણે કહ્યું કે, સરકાર સંજય સિંહના સસ્પેન્શન માટે પ્રસ્તાવ લાવે છે કે તેમને સમગ્ર ચોમાસુ સત્ર માટે સસ્પેન્ડ કરવામાં આવે. તેના પર અધ્યક્ષે કહ્યું કે તમે પ્રસ્તાવ લાવો.

સંજય સિંહના સસ્પેન્શનને લઈને હોબાળો
સંજય સિંહ પર સસ્પેન્શનની કાર્યવાહી બાદ વિપક્ષે મોદી સરકાર પર નિશાન સાધ્યું હતું. આટલું જ નહીં વિપક્ષી સાંસદોએ કાર્યવાહીના વિરોધમાં સંસદની બહાર ધરણા પણ કર્યા હતા. AAP સાંસદો સંજય સિંહ, સંદીપ પાઠક અને સુશીલ ગુપ્તા ઉપરાંત ટીએમસીના ડોલા સેન અને શાંતા છેત્રી, કોંગ્રેસના ઈમરાન પ્રતાપગઢી, અમીબેન અને જેબી માથેર, સીપીએમના બિનોય વિશ્વમ, સીપીઆઈ અને બીઆરએસના રાજીવ નેતાઓએ પણ આ પ્રદર્શનમાં ભાગ લીધો હતો.