ગાઝામાં તબાહી વચ્ચે ઈઝરાયલ વિરુદ્ધ મુસ્લિમ દેશો એક થયા, સાથે મળીને લીધી મોટી એક્શન

વિદેશ મંત્રીઓ વચ્ચે યોજાયેલી આ બેઠકમાં આરબ લીગે ગાઝા પટ્ટીમાં આવશ્યક મૂળભૂત સુવિધાઓમાં કાપ મૂકવાના ઈઝરાયેલના નિર્ણયને અન્યાયી ગણાવ્યો હતો અને ઈઝરાયેલને ગાઝા પટ્ટીમાં વહેલી તકે પાયાની સુવિધાઓ પુનઃસ્થાપિત કરવાની માંગ કરી હતી. વધુમાં, આરબ લીગે ઇઝરાયેલને તેની આંતરરાષ્ટ્રીય જવાબદારીઓ પૂર્ણ કરવા અને બે-રાજ્ય ઉકેલ પર વાટાઘાટોમાં પાછા ફરવા વિનંતી કરી છે.

આ પહેલા સાઉદી અરેબિયાએ મંગળવારે કેબિનેટ સ્તરની બેઠક યોજી હતી. આ બેઠકમાં સાઉદી કિંગ સલમાન અને ક્રાઉન પ્રિન્સ મોહમ્મદ બિન સલમાને પેલેસ્ટાઈન, જોર્ડન અને ઈજિપ્તના રાષ્ટ્રપતિઓ સહિત અન્ય અગ્રણી આંતરરાષ્ટ્રીય નેતાઓ સાથે વાત કરી હતી.

આરબ લીગ ગાઝા પટ્ટીના ઘેરાબંધીની નિંદા કરી

બેઠકમાં આરબ લીગના સભ્ય દેશોના વિદેશ મંત્રીઓએ ઈઝરાયેલ અને હમાસ વચ્ચે ચાલી રહેલા યુદ્ધ અંગે ચર્ચા કરી હતી. આ દરમિયાન મંત્રીઓએ ઇઝરાયેલ પાસે ગાઝાની સંપૂર્ણ નાકાબંધી હટાવવાની માંગ કરી હતી. આરબ લીગે પણ ઇઝરાયલને ગાઝાને વીજળી પુરવઠો અને પાણી કાપવાના નિર્ણય પર પુનર્વિચાર કરવા વિનંતી કરી હતી.

ઈઝરાયેલી સેના દ્વારા ગાઝા પટ્ટીના ઘેરાબંધીની નિંદા કરતા આરબ લીગે કહ્યું કે, માનવતાવાદી સહાયને તાત્કાલિક ગાઝા પટ્ટી સુધી પહોંચવા દેવી જોઈએ. આરબ દેશોના વિદેશ પ્રધાનોએ જણાવ્યું હતું કે આરબ લીગ ઇઝરાયેલને ગાઝા પટ્ટીમાં તાત્કાલિક ખોરાક, ઇંધણ અને માનવતાવાદી સહાય મોકલવા કહે છે.

હમાસે શનિવારે ઇઝરાયેલના એક શહેર પર રોકેટ છોડ્યા ત્યારથી, ઇઝરાયેલી સેના ગાઝા પટ્ટી અને ખાસ કરીને હમાસના સ્થાનો પર બોમ્બમારો કરી રહી છે. ઈઝરાયેલે ગાઝા પટ્ટીને સંપૂર્ણપણે ઘેરી લીધી છે અને પાણી, ખોરાક અને વીજળીનો પુરવઠો બંધ કરી દીધો છે.

હોસ્પિટલોમાં ઓક્સિજનનો અભાવ

ગાઝા સ્ટ્રીપની મીડિયા ઓફિસના કર્મચારી સલામા મારુફે જણાવ્યું કે ગાઝાની સંપૂર્ણ ઘેરાબંધી અને સતત હવાઈ હુમલાને કારણે અહીં રહેણાંક ઈમારતો, મસ્જિદો, ફેક્ટરીઓ અને દુકાનોને અસર થઈ છે.

ગાઝાની અલ-શિફા હોસ્પિટલમાં કટોકટીની સ્થિતિના પ્રભારી મોહમ્મદ ઘોનીમે કહ્યું છે કે હોસ્પિટલમાં ઓક્સિજન સહિતની દવાઓનો પુરવઠો ઘટી રહ્યો છે. જેના કારણે અમને ઘણી સમસ્યાઓનો સામનો કરવો પડી રહ્યો છે.

આરબ લીગ શું છે?

22 માર્ચ, 1945ના રોજ છ દેશોએ મળીને આરબ લીગની સ્થાપના કરી. આરબ લીગના તત્કાલીન સભ્ય દેશો ઇજિપ્ત, ઇરાક, ટ્રાન્સજોર્ડન (જોર્ડન), લેબેનોન, સાઉદી અરેબિયા અને સીરિયા હતા.

હાલમાં આરબ લીગમાં 22 સભ્યો છે – અલ્જેરિયા, બહેરીન, ઇજિપ્ત, ઇરાક, જોર્ડન, કુવૈત, લેબનોન, લિબિયા, મોરેશિયસ, મોરોક્કો, ઓમાન, પેલેસ્ટાઇન, કતાર, સાઉદી અરેબિયા, સોમાલિયા, સુદાન, ટ્યુનિશિયા, સંયુક્ત આરબ અમીરાત, યમન, જીબુતી , કોમોરોસ અને સીરિયા. જોકે, સીરિયાને હાલમાં આરબ લીગમાંથી સસ્પેન્ડ કરી દેવામાં આવ્યું છે.

સાઉદી અરેબિયાએ OICની બેઠક બોલાવવાની માંગ કરી

સાઉદી અરેબિયાએ મંગળવારે ઈઝરાયેલ-પેલેસ્ટાઈન યુદ્ધને લઈને 57 મુસ્લિમ દેશોના સંગઠન ઓર્ગેનાઈઝેશન ઓફ કોઓપરેશન (OIC)ની ઈમરજન્સી બેઠક બોલાવવાની માંગ કરી છે. OICમાં સાઉદી અરેબિયા અને તેના સહયોગી દેશોનું વર્ચસ્વ હોવાનું માનવામાં આવે છે. તેનો ઉદ્દેશ્ય આંતરરાષ્ટ્રીય શાંતિ અને સંવાદિતાનું નિર્માણ કરતી વખતે મુસ્લિમોનું રક્ષણ કરવાનો છે.

સાઉદી અરેબિયાએ બ્રિટન અને કેનેડા સાથે વાત કરી

સાઉદી પ્રેસ એજન્સી અનુસાર, મંગળવારે બ્રિટન અને કેનેડાના વિદેશ મંત્રીએ હમાસ અને ઈઝરાયેલ વચ્ચે ચાલી રહેલા સંઘર્ષને લઈને સાઉદી અરેબિયાના વિદેશ મંત્રી પ્રિન્સ ફૈઝલ બિન ફરહાન સાથે વાત કરી હતી. બ્રિટિશ વિદેશ મંત્રી જેમ્સ ક્લેવરલી અને કેનેડાના વિદેશ મંત્રી મેલોની જોલીએ પણ ગાઝા અને તેની આસપાસના વિસ્તારોમાં તણાવ ઘટાડવાની જરૂરિયાત અંગે ચર્ચા કરી હતી.

આ વાતચીત દરમિયાન, સાઉદી અરેબિયાએ પેલેસ્ટિનિયન લોકોની આકાંક્ષાઓને પૂર્ણ કરવા અને આ સંઘર્ષનો યોગ્ય ઉકેલ શોધવાના મહત્વનો પુનરોચ્ચાર કર્યો છે. આ સિવાય સાઉદી અરેબિયાએ આંતરરાષ્ટ્રીય સમુદાયને નાગરિકોની સુરક્ષા અને આંતરરાષ્ટ્રીય શાંતિ અને સુરક્ષા જાળવવા માટે એકસાથે આવવાનું આહ્વાન કર્યું હતું.