ગાઝા પટ્ટી પર રોકેટ્સનો વરસાદ, હમાસના 17 સૈન્ય સ્થાનો પર હુમલો, ઈઝરાયલનો ઘાતક બદલો શરૂ

નેતન્યાહુએ કહ્યું કે અમે યુદ્ધમાં છીએ, કોઈ ઓપરેશનમાં નથી. આજે સવારે હમાસે ઈઝરાયેલ અને તેના નાગરિકો પર ઘાતક હુમલો કર્યો હતો. દુશ્મનને આની કિંમત ચૂકવવી પડશે. અમે યુદ્ધમાં છીએ અને અમે જીતીશું. તેમણે કહ્યું કે, મેં મારી તમામ સુરક્ષા પ્રણાલીના વડાઓને બોલાવ્યા અને હમાસના સ્થાનો નષ્ટ કરવાનો આદેશ આપ્યો અને મોટા પાયે તોપખાનાને એકત્ર કરવાનો આદેશ આપ્યો. અમે હમાસના હુમલાનો જડબાતોડ જવાબ આપીશું. દુશ્મનને આની ભારે કિંમત ચૂકવવી પડશે.

ઈઝરાયલ ડિફેન્સ ફોર્સ (IDF) એ કહ્યું કે, અમે હમાસના હુમલાના જવાબમાં ઓપરેશન ‘આયર્ન સ્વોર્ડ્સ’ શરૂ કર્યું છે. તેના દ્વારા ગાઝા પટ્ટીમાં હવા, જમીન અને સમુદ્રમાંથી રોકેટ છોડવામાં આવી રહ્યા છે. ઇઝરાયેલની વાયુસેનાએ તેના સત્તાવાર ટ્વિટર એકાઉન્ટ પર જણાવ્યું હતું કે વાયુસેનાના ડઝનેક ફાઇટર પ્લેને સમગ્ર ગાઝા પટ્ટીમાં આતંકવાદી સંગઠન હમાસના 17 સૈન્ય સંકુલ અને 4 મુખ્યાલયો પર હુમલો કર્યો છે. IDFના પ્રવક્તા રિયર એડમિરલ ડેનિયલ હગારીએ પ્રેસ કોન્ફરન્સમાં જણાવ્યું હતું કે સવારે 6:30 વાગ્યાથી ઇઝરાયેલમાં રોકેટ છોડવામાં આવ્યા હતા. ઇઝરાયેલી સૈનિકો ઓછામાં ઓછા સાત સ્થળોએ ઘૂસણખોરો સામે લડી રહ્યા છે.

હમાસનો દાવો – ગાઝાથી ઈઝરાયેલમાં હજારો રોકેટ છોડવામાં આવ્યા

બીજી તરફ ગાઝા પટ્ટી પર નિયંત્રણ ધરાવતા ઈસ્લામિક જૂથ હમાસના એક વરિષ્ઠ કમાન્ડરે દાવો કર્યો છે કે ગાઝાથી ઈઝરાયેલમાં હજારો રોકેટ છોડવામાં આવ્યા છે. હમાસે એવો પણ દાવો કર્યો હતો કે તેણે વહેલી સવારે ઈઝરાયેલ તરફ 5,000 રોકેટ છોડ્યા હતા, જેને તેણે “ઓપરેશન અલ-અક્સા ફ્લડ” નામ આપ્યું હતું. એ પણ કહ્યું કે હમાસની કાર્યવાહી અલ-અક્સા મસ્જિદ વિરુદ્ધ આક્રમણ સામે છે.

ઈઝરાયલના સંરક્ષણ મંત્રીએ કહ્યું- દરેક જગ્યાએ દુશ્મનો સામે લડાઈ

ઇઝરાયેલના સંરક્ષણ પ્રધાન યોવ ગાલાંટે કહ્યું કે IDF સૈનિકો દરેક જગ્યાએ દુશ્મનો સામે લડી રહ્યા છે. હું તમામ ઇઝરાયેલી નાગરિકોને સલામતી સૂચનાઓનું પાલન કરવા કહું છું. તે જ સમયે, Haaretz Onlineએ હમાસની લશ્કરી પાંખના વડા મોહમ્મદ ડેઇફને ટાંકીને કહ્યું કે અમે દુશ્મનને ચેતવણી આપી છે કે અલ-અક્સા મસ્જિદ સામે તેની આક્રમકતા ચાલુ ન રાખે. તેમણે કહ્યું કે હમાસ દ્વારા ઈઝરાયેલ વિરુદ્ધ નવા હુમલાઓનો આ માત્ર પ્રથમ તબક્કો છે. ડેફે જેરુસલેમ અને ઇઝરાયેલમાં નેગેવ, ગેલિલી અને ઉત્તરી ઇઝરાયેલના આરબોને અપીલ કરી છે કે તેઓ આ ક્રાંતિમાં જોડાય અને કબજો કરનારાઓની ધરતી પર આગ લગાવે.

IDFના ભૂતપૂર્વ પ્રવક્તા લેફ્ટનન્ટ કર્નલ (નિવૃત્ત) અવિતલ લીબોવિચે કહ્યું કે આ કોઈ સામાન્ય હુમલો ન હતો, સવારે 6.30 વાગ્યે રજાનો દિવસ હતો. દરેક વ્યક્તિ સૂઈ રહ્યા હતા, પરંતુ સવારે અમે હૃદયદ્રાવક વિસ્ફોટોના અવાજથી જાગી ગયા. તેમણે કહ્યું કે અમે આ યુદ્ધમાં 6 કલાકથી વધુ સમય પસાર કર્યો છે, ઇઝરાયેલના સમુદાયો, શહેરો અને ઘરો પર હજારો રોકેટ છોડવામાં આવ્યા છે. હમાસ હવાઈ, પેરાગ્લાઈડર, દરિયાઈ, બોટ અને જમીન માર્ગો દ્વારા ઈઝરાયેલમાં ઘૂસણખોરી કરી રહ્યું છે. તેમણે કહ્યું કે મારો અંદાજ છે કે હમાસના સેંકડો આતંકવાદીઓ હથિયારોથી સજ્જ હતા. 40 થી વધુ ઇઝરાયેલીઓની હત્યા કરવામાં આવી છે. સેંકડો લોકો હાલમાં સમગ્ર ઇઝરાયેલમાં હોસ્પિટલમાં દાખલ છે. ઇઝરાયેલની બ્લડ બેંક રક્તદાન માટે કહી રહી છે અને દરેક જગ્યાએ ખાસ પરિસ્થિતિ માટે કહેવામાં આવ્યું છે.