શંકરસિંહ વાઘેલા BJP અને શિવસેનાનું પુન:મિલન કરાવશે? અચાનક ઉદ્ધવ સાથે મુલાકાત બાદ પ્રેસકોન્ફરન્સ

મીડિયા સાથે વાતચીત કરતા તેમણે શંકરસિંહ વાઘેલા સાથેની મુલાકાત મુદ્દે માહિતી આપી હતી. ઠાકરેએ કહ્યું કે, બેઠકમાં કોઈ જ ચર્ચા નથી થઈ. પરંતું તેઓ ભાજપમાં હતા ત્યારના દિવસ યાદ કરી રહ્યા હતા. ઉલ્લેખનીય છે કે, આ એ સમય હતો જ્યારે શંકરસિંહ વાઘેલાએ ભાજપમાં રહેતા બળવો કર્યો હતો. તે સમયે ન્યૂઝ ચેનલ્સે સમાચાર પ્રસારિત કર્યા હતા કે શંકરસિંહ વાઘેલા માતોશ્રી ખાતે બાળાસાહેબ ઠાકરેને મળવા માટે રવાના થયા છે. ઠાકરેએ આ મુદ્દે પોતાની પ્રેસવાર્તામાં કહ્યું કે આ સમયે ભાજપના દિવંગત નેતા પ્રમોદ મહાજન અચાનક માતોશ્રી પહોંચ્યા હતા. બાળાસાહેબે ત્યારે મહાજનને પૂછ્યું કે અચાનક આવવાનું કોઇ ખાસ પ્રયોજન ? જેના જવાબમાં મહાજને કહ્યું કે, વાઘેલા ગુજરાત છોડીને માતોશ્રી આવી રહ્યા છે તેવા સમાચાર છે.

જો કે મહારાષ્ટ્રમાં આપણું (ભાજપ અને શિવસેના) ગઠબંધન છે તેવામાં તમે તેની સાથેમુલાકાત ન કરો તે યોગ્ય ગણાશે. આ મુદ્દે બાળાસાહેબે કહ્યું હતું કે મને ખબર છે કે સેના અને ભાજપના ગઠબંધનમાં શું કરવું અને શું ન કરવું. ચિંતા ન કરશો અને મને કહેવાની જરુર નથી. ટૂંકમાં આ સમગ્ર વાત જણાવીને ઉદ્ધવ ઠાકરેનું કહેવું હતું કે શિવસેના તે સમયે ભાજપ પ્રત્યે કેટલી વફાદાર અને પ્રામાણિક રહી હતી અને એ જ ભાજપે તેના સાથે દગો કર્યો. આમ આ વાત કરીને ઉદ્ધવ ઠાકરેએ શંકરસિંહ વાઘેલાના બહાને ભાજપ પર નિશાન સાધ્યું હતું.

મહત્વનું છે કે, આ અગાઉ શંકરસિંહ વાઘેલા અન્ય કેટલાય નેતાઓ સાથે મુલાકાત કરી ચૂક્યા છે. હાલમાં જ તેમણે આનંદીબેન પટેલ સાથે મુલાકાત કરી હતી. તો તે પહેલા સમાજવાદી પાર્ટીના નેતા અખિલેશ યાદવ સાથે પણ તેમણે મુલાકાત કરી હતી. 2024ની લોકસભા ચૂંટણી નજીક આવી રહી છે તે પહેલા શંકરસિંહ વાઘેલાનું આ રીતે નેતાઓ સાથેની મુલાકાતે ચર્ચાઓ જગાવી છે.