વર્લ્ડ કપ…વર્લ્ડ ટેસ્ટ ચેમ્પિયનશિપ, નવા વર્ષમાં ટીમ ઈન્ડિયા સામે હશે આ 5 મોટા પડકારો..

એશિયા કપ અને T20 વર્લ્ડ કપ 2022 જેવી મોટી ટૂર્નામેન્ટમાં, રોહિત બ્રિગેડ મહત્વની મેચો હારી બેઠી હતી. હવે ભારતીય ટીમ ભૂતકાળની ભૂલો અને કડવી કડવી યાદોને ભૂલીને નવા વર્ષમાં એટલે કે 2023માં વધુ સારું પ્રદર્શન કરવા માંગશે. જોકે, વર્ષ 2023 ભારતીય ટીમ માટે સરળ નથી. ટીમ ઈન્ડિયા માટે ઘણા પડકારો હશે. જાણો વિગતવાર માહિતી…

વર્લ્ડ ટેસ્ટ ચેમ્પિયનશીપ
ટીમ ઈન્ડિયાને વર્ષ 2021માં વર્લ્ડ ટેસ્ટ ચેમ્પિયનશિપની પ્રથમ સિઝનની ફાઈનલમાં ન્યૂઝીલેન્ડના હાથે હારનો સામનો કરવો પડ્યો હતો. હવે ભારતીય ટીમ ફરી એકવાર ટેસ્ટ ચેમ્પિયનશિપની ફાઇનલમાં પહોંચવાની રેસમાં છે. જો ભારતીય ટીમ ઓસ્ટ્રેલિયા સામેની ચારમાંથી ત્રણ ટેસ્ટ જીતી લે તો તે આરામથી ફાઈનલમાં પહોંચી જશે. જૂન મહિનામાં ઓવલમાં ફાઇનલ મેચ રમાવાની છે.

T20 ક્રિકેટમાં ફેરફાર
2007માં તેની શરૂઆતની સીઝનની સફળતા બાદથી ભારત T20 વર્લ્ડ કપ જીતી શક્યું નથી. વર્ષ 2021 અને 2022ના T20 વર્લ્ડ કપમાં ભારતીય ટીમ પોતાના શ્રેષ્ઠ પ્રદર્શનથી ઘણી દૂર હતી. આવી સ્થિતિમાં ભારતીય ટી-20 ટીમમાં ઘણા સુધારાની જરૂર છે. બીસીસીઆઈ નવા કેપ્ટન પર વિચાર કરી રહી છે જ્યારે આ ફોર્મેટ માટે અલગ કોચ પણ એજન્ડામાં છે. એવી અપેક્ષા રાખવામાં આવે છે કે હાર્દિક પંડ્યા આ બદલાવનું નેતૃત્વ કરશે, જેમાં સિનિયરને બદલે યુવા ખેલાડીઓને સામેલ કરવામાં આવશે.

2023 ODI વર્લ્ડ કપ
ભારત આવતા વર્ષે ઓક્ટોબરના અંતમાં ODI વર્લ્ડ કપની યજમાની કરશે. ફરી એકવાર ટીમ ઈન્ડિયા પાસેથી ઘરઆંગણે સારા પ્રદર્શનની આશા રાખવામાં આવશે. ભારતે 2013ની ચેમ્પિયન્સ ટ્રોફી પછી એકપણ ICC ટાઇટલ જીત્યું નથી અને 2023 આ દુષ્કાળને ખતમ કરવાની સુવર્ણ તક હશે.

વરિષ્ઠ ખેલાડીઓનું ભવિષ્ય
વિરાટ કોહલી, રોહિત શર્મા, ભુવનેશ્વર કુમાર, રવિન્દ્ર જાડેજા અને મોહમ્મદ શમીની ઉંમર હવે 30થી વધુ છે. કોહલી-રોહિત, ભુવી અને શમી સતત બે T20 વર્લ્ડ કપ રમ્યા છે. તે જ સમયે, રવીન્દ્ર જાડેજા ઈજાના કારણે 2022 ટૂર્નામેન્ટમાંથી બહાર થઈ ગયો હતો. વાઈસ-કેપ્ટન તરીકે કેએલ રાહુલે ટોપ ઓર્ડરમાં રન બનાવવા માટે સંઘર્ષ કર્યો છે. તે જ સમયે, અશ્વિન અને દિનેશ કાર્તિકે હજુ સુધી T20માંથી નિવૃત્તિ લીધી નથી. નવા વર્ષમાં BCCI સિનિયર ખેલાડીઓના ભવિષ્યને લઈને શું નિર્ણય લેશે તેના પર સૌની નજર રહેશે.

બોર્ડર ગાવસ્કર ટ્રોફી
છેલ્લા કેટલાક વર્ષોમાં ભારત અને ઓસ્ટ્રેલિયા વચ્ચેની ટક્કર ઝડપથી વધી છે. હવે ઓસ્ટ્રેલિયાની ટીમ ફેબ્રુઆરી-માર્ચમાં ભારતીય ધરતી પર ચાર ટેસ્ટ મેચ રમવા જઈ રહી છે. ટેસ્ટ ચેમ્પિયનશિપની ફાઇનલમાં પહોંચવા માટે ભારતીય ટીમ માટે આ સિરીઝ મહત્ત્વપૂર્ણ છે. આ સાથે જ ભારત પર પોતાના ઘરેલુ રેકોર્ડને જાળવી રાખવાનું દબાણ રહેશે.

ઓસ્ટ્રેલિયા 2004થી ભારતમાં જીત્યું નથી. આવી સ્થિતિમાં પેટ કમિન્સની આગેવાની હેઠળની ટીમની નજર પહેલાથી જ ચાર મેચની ટેસ્ટ શ્રેણી પર છે. ભારતે જીતવા માટે પોતાનું શ્રેષ્ઠ પ્રદર્શન કરવું પડશે.