ટિકિટ વહેંચણી વિવાદથી ભાજપમાં ભડકો? ડેમેજ કંટ્રોલ માટે અમિત શાહ મેદાનમાં!

ભાજપમાં આંતરિક વિવાદ ચરમસીમા પર…
મીડિયા અહેવાલો પ્રમાણે રવિવારે સાંજે અમિત શાહે ભાજપ કાર્યાલય કમલમ ખાતે 3થી 4 કલાક સુધીની ઉચ્ચ સ્તરીય બેઠકનું આયોજન કર્યું હતું. જેમાં મુખ્યમંત્રી ભુપેન્દ્ર પટેલ, કેન્દ્રીય મંત્રી મનસુખ માંડવિયા અને વિવિધ ઝોનના મહા સચિવોએ પણ હાજરી આપી હોવાની માહિતી મળી રહી છે.

પ્રેમથી મનાવવા પ્રયત્ન કરવા ટકોર
નારાજ નેતાઓને મનાવવા માટે અત્યારે ભાજપના દિગ્ગજો પણ મેદાનમાં ઉતર્યા છે. મીડિયા રિપોર્ટ્સ પ્રમાણે અત્યારે આ તમામ નેતાઓ ભાજપના પરિવારના સભ્યો હોવાથી તેમને પ્રેમથી મનાવવા ટકોર કરાઈ છે. અત્યારે અહેવાલો પ્રમાણે અમિત શાહ પણ ભાજપથી નારાજ ચાલી રહેલા વર્તમાન ધારાસભ્યો અને અન્ય નેતાઓને મનાવવા માટે બેઠકો કરી રહ્યા છે. અહીં જે બેઠકો પર અસંતોષની લાગણી પ્રસરી છે ત્યાં તેઓ સમિક્ષા બેઠક પણ કરી શકે છે.

ઉલ્લેખનીય છે કે ભાજપે દિગ્ગજોની ટીમ ડેમેજ કંટ્રોલ માટે મેદાનમાં ઉતારી છે. પરંતુ તેમ છતા જો કેટલાક નેતાઓમાં અસંતોષ રહ્યો તો ભાજપને આનાથી થોડુ ઘણું નુકસાન થવાના એંધાણ પણ જણાઈ રહ્યા છે.