નવસારીમાં ચાલુ સ્કૂલે ધો.12 સાયન્સની વિદ્યાર્થિનીને હાર્ટ એટેક આવ્યો, હોસ્પિટલ પહોંચતા પહેલા જ મોત

સ્કૂલમાં રીશેષ બ્રેક બાદ સીડી ચડતા તબિયત લથડી
વિગતો મુજબ, નવસારી શહેર નજીક આવેલા પરતાપોર ગામમાં એ.બી સ્કૂલમાં ધો.12 સાયન્સની અંગ્રેજી માધ્યમની વિદ્યાર્થિની તનિષા ગાંધી દરરોજની જેમ આજે સ્કૂલે પહોંચી હતી. અભ્યાસ બાદ સવારે 10 વાગ્યે રીસેશ પડી હતી. 15 મિનિટની બ્રેક બાદ તનિષા પોતાની બહેનપણી સાથે સીડી ચડી રહી હતી. દરમિયાન અચાનક તેની તબિયત લથડી અને તે ઢળી પડી.

બે વર્ષ પહેલા માતાનું કોરોનાથી મોત થયું હતું
તનિષાની તબિયત બગડતા તાત્કાલિક તેને શાળાના સ્ટાફ દ્વારા સારવાર માટે લઈ જવામાં આવી હતી. જોકે હોસ્પિટલ પહોંચતા જ તબીબોએ તેને મૃત જાહેર કરી હતી. ત્યારે અચાનક આ રીતે વિદ્યાર્થિનીનું મોત થતા શાળામાં તથા પરિવારજનોમાં શોકનો માહોલ છવાઈ ગયો હતો. તનિષાની માતાનું પણ બે વર્ષ પહેલા જ કોરોનાથી મોત થયું હતું, જ્યારે પરિવારમાં તે અને તેના પિતા જ હતા. હવે પુત્રીનું પણ મોત થતા પરિવારમાં પિતા એકલા રહી ગયા.