BJPએ નિયમ વિરુદ્ધ જઈ ટિકિટ આપી તે યોગેશ પટેલને PM મોદીએ બે વાર સ્ટેજ પર બોલાવીને શું કહ્યું?

યોગેશ પટેલને બોલાવીને PMએ શું કહ્યું?
PM મોદીએ યોગેશ પટેલને બોલાવીને પૂછ્યું હતું કે, બધું બરાબર છે ને? સારા મતથી જીતશો ને? જેના જવાબમાં યોગેશ પટેલે હા પાડી હતી. સાથે જ તેમણે શિવરાત્રીના તહેવારમાં વડોદરામાં આવવાનું આમંત્રણ આપ્યું હતું. શહેરના સુરસાગર તળાવમાં શિવજીની 111 ફૂટ ઊંચી પ્રતિમાને સોનાનો ઢોળ ચડાવવાની કામગીરી ચાલી રહી છે. શિવરાત્રી પહેલા આ કામ પૂર્ણ કરીને શિવરાત્રીએ સમારોહ યોજાશે. આ માટે યોગેશ પટેલે PM મોદીને વડોદરા આવવા આમંત્રણ આપ્યું હતું, જેનો PMએ સ્વીકાર કર્યો હતો.

શિવરાત્રીએ PM આવશે વડોદરા
PMએ હળવા અંદાજમાં યોગેશ પટેલને સવાલ કર્યો હતો કે શિવજીની પ્રતિમા પર સોનું ચડી ગયું છે? યોગેશ પટેલે હા પાડતા PMએ કહ્યું, તો તો સિક્યોરિટી પણ રાખવી પડશે.ત્યારે યોગેશ પટેલે કહ્યું કે, સિક્યોરિટીની જરૂર નથી. શિવજીની પ્રતિમા પાણીની વચ્ચે 32 ફૂટ ઊંચે છે.

ભાજપે નિયમ વિરુદ્ધ જઈ યોગેશ પટેલને ટિકિટ આપી
નોંધનીય છે કે, યોગેશ પટેલને માંજલપુરથી ભાજપે ટિકિટ રાખી છે. ભાજપ દ્વારા ચૂંટણીમાં 75 વર્ષથી મોટી ઉંમરના નેતાઓને ટિકિટ ન આપવાનો નિયમ બનાવાયો છે. જોકે યોગેશ પટેલે આ નિયમ વિરુદ્ધ જઈને ટિકિટ માગતા કોકડું ગૂંચવાયું હતું. ભાજપે 181 ઉમેદવારો જાહેર કરી દીધા બાદ ફોર્મ ભરવાના છેલ્લા દિવસે યોગેશ પટેલના નામની જાહેરાત થઈ અને તેમણે માંજલપુરથી ચૂંટણી લડવા ફરી ઉમેદવારી નોંધાવી હતી.