‘હું એવો સાહેબ છું જે પીધેલો હોયને બોલું, તે જ કાલે બોલીશ’, નાયબ મામલતદાર દારૂ પાર્ટી કરતા દેખાયા

હાથમાં દારૂનો ગ્લાસ લઈને પાર્ટી કરતા દેખાયા નાયબ મામલતદાર
મહીસાગર જિલ્લામાં કડાણા તાલુકામાં નાયબ મામલતદાર તરીકે ફરજ બજાવતા રાકેશ પરમાર નામના અધિકારીનો દારૂ પીતો વિડિયો સામે આવ્યો છે. આ વીડિયોમાં તેઓ હાથમાં દારૂનો ગ્લાસ પકડીને બોલી રહ્યા છે કે, ‘હું એવો સાહેબ છું કે પીધેલો હોયને જે બોલું, તે જ આવતીકાલે બોલીશ.’ સમગ્ર રાજ્યમાં દારૂબંધી છે ત્યારે મહીસાગર જિલ્લામાં એક નાયબ મામલતદાર કક્ષાનો અધિકારી સરકારને અને પોલીસ તંત્રને પડકાર ફેંકતા હોય તેમ આ વીડિયોમાં જોવા મળી રહ્યું છે. આવા અધિકારી વિરૂદ્ધ કાયદેસરની કાર્યવાહી કરવા માંગ ઉઠી રહી છે.

આ પણ વાંચો: મહિસાગરમાં ડાંગર તોલવા આવેલા અધિકારીઓ ખુલ્લામાં માણી રહ્યા હતા દારૂની મહેફીલ, વિડીયો થયો વાયરલ

6 મહિના જૂનો વીડિયો હોવાનું જણાવ્યું
Gujarat Tak દ્વારા આ નાયબ મામલતદારનો સંપર્ક કરવામાં આવ્યો હતો. જેમાં તેમણે ટેલિફોનિક વાતચીતમાં વીડિયો 6 મહિનાથી પણ જૂનો હોવાનું જણાવ્યું હતું. સાથે જ તેમણે કહ્યું કે, તેઓ મિત્રના ઘરે ગયા હતા, ત્યારનો વીડિયો છે. તેમની સાથે અન્ય એક નાયબ મામલતદાર પણ હતા. તેમણે જ આ વીડિયો ઉતાર્યો હોવો જોઈએ. રાકેશ પરમારે આક્ષેપ કર્યો હતો કે, તેમની સાથેના નાયબ મામલતદાર અગાઉ કેટલાક પત્રકારોને લઈને તેમની પાસે આવ્યા હતા અને વીડિયો બતાવીને મામલો દબાવવાની વાત કરી હતી. જોકે પૈસા ન આપતા તેમણે વાઈરલ કરી દીધો.

આ પણ વાંચો: થર્ટી ફર્સ્ટ પહેલાં દાહોદમાં 40 જગ્યાએ પોલીસના દરોડા, 26 આરોપીઓની ધરપકડ

ગઈકાલે ડાંગર તોલવા આવેલા કર્મચારીઓની દારૂ પાર્ટી પકડાઈ હતી
ઉલ્લેખનીય છે કે મહિસાગર જિલ્લાના લુણાવાડામાં પણ ગઈકાલે લુણાવાડા કોલેજ ગ્રાઉન્ડમાં ટેકાના ભાવે ડાંગર ખરીદી કરતા કર્મચારીઓનો દારૂની મહેફિલ માણતો વીડિયો વાયરલ થયો હતો અને આજે ફરી એકવાર મહીસાગર જિલ્લાના કડાણાના નાયબ મામલતદારનો દારૂના ગ્લાસ સાથે વીડિયો વાયરલ થયો છે ત્યારે તંત્ર કડકમાં કડક કાર્યવાહી કરે તે જરૂરી છે જેથી બીજી વાર આવા કૃત્યો કરતા અધિકારીઓ વિચાર કરે ત્યારે જોવું રહ્યું કે તંત્ર કેવી પ્રકારની કાર્યવાહી કરે છે.

તમારા વ્હોટ્સએપ પર વધારે સમાચારો અને બ્રેકિંગ ન્યૂઝ મેળવવા માટે ક્લિક કરો…