‘ટિકિટની અપેક્ષા નથી’ કહીને કોંગ્રેસમાંથી BJPમાં જોડાનારા જયરાજસિંહે ચૂંટણી લડવા દાવેદારી નોંધાવી

આ વર્ષે જ કોંગ્રેસમાંથી ભાજપમાં જોડાયા હતા
37 વર્ષ સુધી કોંગ્રેસમાં રહીને તેની વિચારધારા સાથે કામ કરનારા જયરાજસિંહ પરમાર આ વર્ષે ફેબ્રુઆરી મહિનામાં જ કોંગ્રેસ સાથે છેડો ફાડીને ભાજપમાં જોડાઈ ગયા હતા. જોકે ભાજપમાં જોડાતા તેમણે ટિકિટની કોઈ અપેક્ષા ન હોવાની વાતો કરી હતી. જોકે સેન્સની પ્રક્રિયા શરૂ થતા જ તેઓ ટિકિટ માટે દાવેદારી નોંધાવવા પહોંચી ગયા હતા. તેમણે મહેસાણાની ખેરાલુ બેઠક પરથી ચૂંટણી લડવા માટે દાવેદારી નોંધાવી હતી. આ દરમિયાન તેમણે એમ પણ જણાવ્યું હતું કે, પાર્ટી ટિકિટ આપશે તો લડીશ.

ચૂંટણી નજીક આવતા જ ટિકિટના અભરખા જાગ્યા
નોંધનીય છે કે, કોંગ્રેસ પક્ષમાં 37 વર્ષ સુધી રહ્યા બાદ જયરાજસિંહ પરમારે ગુજરાતની ચૂંટણી પહેલા જ પક્ષપલટો કરી લીધો હતો. તેમણે ચૂંટણી લડવાની તે વખતે તો કોઈ વાત નહોતી કરી પરંતુ વિધાનસભા ચૂંટણી નજીક આવતા જ તેમના ચૂંટણી લડવાના અભરખા ફરી જાગી ગયા છે. જે સ્પષ્ટ કરે છે કે નેતાઓ માત્રને માત્ર ચૂંટણી લડવાના મોહ સાથે જ પક્ષપલટો કરતા હોય છે.

ખેરાલુ બેઠકનું સમીકરણ શું છે?
મહેસાણા જિલ્લાની ખેરાલુ વિધાનસભા બેઠકની વાત કરીએ તો વર્ષ 2002થી આ સીટ પર ભાજપનો દબદબો રહ્યો છે. ભાજપમાંથી વર્ષ 2007થી સતત ત્રણ ટર્મ સુધી ભરતસિંહ ડાભી આ બેઠક પરથી ચૂંટણી જીત્યા હતા. જોકે વર્ષ 2019માં યોજાયેલી પેટા ચૂંટણીમાં ભાજપના જ અજમલજી ઠાકોર આ બેઠક પરથી ચૂંટણી જીત્યા હતા.