ગુજરાતના આ ગામમાં કેમ છે સતત ફફડાટ, સિંહ દીપડા કરતા લોકોને છે કોનો વધારે ડર?

ભૂકંપના આંચકાથી ભયભીત લોકો
અમરેલી જિલ્લાના સાવરકુંડલાનું મિતિયાળા ગામ કે જ્યાં 1800 લોકોની વસ્તી વસવાટ કરે છે. મિતિયાળા ગામ મિતિયાળા અભ્યારણ એટલે કે જંગલને અડીને આવેલું ગામ છે સિંહ દીપડા જેવા હિંસક પશુઓ કરતા પણ આ મિતિયાળા ગામમાં છેલ્લા એક દોઢ માસથી ધરતીકંપના આંચકાઓએ આખા ગામમાં ભયનું લખલખું ફેલાવી દીધું છે. જેના કારણે આ કડકડતી ઠંડીમાં પણ ગ્રામ્યજનોને ઘરની બહાર સુવાની મજબૂરી ઉભી થઇ છે. ગઈકાલે ગામમાં સવારે 7.42 વાગ્યે પ્રથમ ભૂકંપનો આંચકો અનુભવાયો બાદમાં બપોરે 5.55 વાગ્યે ફરી ધરા ધ્રુજી અને સાંજના 7.05 મિનિટે ત્રીજીવાર ભૂકંપનો આંચકો આવ્યો અને ફરી એકવાર રાત્રીના 8.34 એ ચોથીવાર ગામની ધરા ધ્રુજતા ગામમાં ભયનું વાતાવરણ ઊભું થયું છે. લોકો સતત ફફડાટમાં જીવવા મજબૂર બન્યા છે કે નઈને ક્યાંક રાત્રીના ભૂકંપનો આંચકો આવે અને મકાન ધરાશાયી થઈ જાય તો, એ ડરના કારણે ગંભીર દહેશત વચ્ચે ગામના નાના નાના ભૂલકા ઓથી લઈને વયોવુદ્ધો પોતાના મકાનની બહાર ફળિયામાં સુવાની લાગ્યા છે. ફળિયામાં ખાટલા ઢાળીને વચ્ચે તાપણું કરીને સિંહ દીપડા જેવા હિંસક પશુઓના ડર વચ્ચે પણ હાલ ભુકંપના કારણે ભયના ઓથાર હેઠળ લોકો કડકડતી ઠંડીમાં પોતાનો રુમ છોડીને બહાર સૂવા માટે મજબૂર બન્યા છે. જાયે તો કહા જાયે તેવી સ્થિતિ અત્યારે ગામવાસીઓની થઈ છે. મોટા તો ઠીક પણ સ્ત્રીઓ અને બાળકો વધારે ભયભીત બન્યા છે.

જીવન અને મોત વચ્ચે જિંદગી અટવાઈ
ગામમાં સિંહ અને દીપડાના હુમલાની પણ દહેશત છે. છતાંય વારંવારના ભૂકંપના આંચકાઓ વચ્ચે ખરેખર મિતિયાળા ગામના લોકો જીવન અને મોત વચ્ચેની પાતળી ભેદરેખામાં જીવવા મજબૂર બન્યા છે. કારણ કે આંચકાની ફડક એટલી હદે પેશી ગઈ છે લોકોના માનસ પર કે સતત એવું લાગ્યા કરે છે કે મકાન ધરાશાયી થઈ જશે તો એ ડરના કારણે રાતના ઉજાગરા પણ કરવા પડી રહ્યાં છે.

દોઢ઼ માસમાં 40 આંચકાએ ઉંચકાવ્યા લોકોના જીવ
મિતિયાળા ગામમાં છેલા એક દોઢ માસમાં 40 જેટલા ભુકમ્પના આંચકાઓ સહન કરી ચૂક્યું છે ને ભુકમ્પના આંચકાઓથી ઘરમાં રાખેલા વાસણો પડી જાય છે ઘણી મકાનોની દીવાલોમાં તિરાડો પડી ગઈ છે ને તંત્રને અનેકવાર લેખિત મૌખિક રજૂઆતો કરી ચૂકેલા સરપંચ પણ ધૂતરાષ્ટ્ર ની ભૂમિકા ભજવતા તંત્ર સામે લાચાર બની ગયું છે ને શિયાળાની કડકડતી ઠંડી હોય ને ઉપરથી હિંસક પશુઓના રહેઠાણ વચ્ચે પણ ભૂકંપનો ભય મિતિયાળા વાસીઓની ઊંઘ હરામ કરી દીધી છે

પ્રશાસન પાસે મદદની કાગડોળે રાહ
ગામલોકોમાં વાસીઓને ભૂકંપનો ભય ઘર કરી ગયો છે. કારણ કે છેલ્લા એક મહિનામાં 40 – 50 જેટલા હળવા આંચકા ગામ લોકો સહન કરી ચૂક્યા છે.  સતત ધરતીકંપના કારણે લોકોની ઊંઘ હરામ થઈ ચૂકી છે. ગામલોકોને હવે આશા છે કે પ્રશાસન મદદ કરવા માટે આગળ આવે તો સારી વાત છે. અને દરેક ગામવાસી મદદની કાગડોળે રાહ પણ જોઈ રહ્યાં છે.