બનાસકાંઠામાં પશુસહાય મુદ્દે ગૌ-સેવકોએ ‘સામૂહિક મૂંડન’ કરાવ્યું, વિરોધ પ્રદર્શન બન્યું ઉગ્ર

માગ નહીં સંતોષાય ત્યાં સુધી પ્રદર્શન શરૂ રખાશે
ગુજરાતમાં રાજ્ય સરકારે જાહેર કરેલા પશુસહાય બજેટના 500 કરોડ રૂપિયા હજુ સુધી ચૂકવવામાં આવ્યા નથી. જેના પરિણામે બે દિવસ અગાઉ અનેક પશુઓને રસ્તા પર છોડી મુકાયા હતા. તેવામાં હવે ગૌસંચાલકોએ જણાવ્યું છે કે જ્યાં સુધી તેમને કાયમી સહાય વ્યવસ્થા નહીં મળે ત્યાં સુધી અવનવી રીતે તેઓ વિરોધ નોંધાવતા રહેશે.

PM મોદી અંબાજી આવશે ત્યારે ગૌસેવકો મદદ માગશે
વડાપ્રધાન નરેન્દ્ર મોદી આગામી ગુજરાત પ્રવાસ દરમિયાન મા અંબાના શરણે જશે. અંબાજી મંદિરે વડાપ્રધાન દર્શન કરવા પહોંચશે ત્યારે 5000 ગૌસેવકો ત્યાં પોતાની માગણી લઈને પહોંચશે. નોંધનીય છે કે અત્યારે સરકારે જાહેરાત કર્યા પછી ગૌશાળા-પાંજરાપોળોને યોગ્ય સહાય ન ચૂકવી હોવાથી બનાસકાંઠા સહિત સમગ્ર ગુજરાતમાં ગૌસેવકોમાં ભારે આક્રોશ ભભૂકી ઉઠ્યો છે.