ચૂંટણી પહેલા નવાજૂનીના એંધાણ? અશોક ગેહલોત સાથે ભાજપના આ પૂર્વ મંત્રીની બંધ બારણે મુલાકાત

અમદાવાદમાં સર્કિટ હાઉસમાં બંને નેતાઓ વચ્ચે મુલાકાત
આજે અમદાવાદમાં સર્કિટ હાઉસ ખાતે ગુજરાત કોંગ્રેસના પ્રભારી અશોક ગેહલોત અને ભાજપના પૂર્વ મંત્રી જયનારાયણ વ્યાસ વચ્ચે બંધ બારણે મુલાકાત થઈ હતી. માહિતી મુજબ લગભગ 20 મિનિટ સુધી બંને નેતાઓ વચ્ચે બેઠક થઈ હતી. ત્યારે ચૂંટણી પહેલા જ તેમની આ મુલાકાતને સૂચક માનવામાં આવી રહી છે. વર્ષ 2017માં જયનારાયણ વ્યાસ પાટણની સિદ્ધપુર બેઠક પરથી ચૂંટણી લડ્યા હતા.

ગુજરાતમાં ચૂંટણી પહેલા રાજકારણમાં ગરમાવો
નોંધનીય છે કે, ગુજરાતના રાજકારણમાં ચૂંટણી પહેલા સતત ગરમાવો આવી રહ્યો છે. આવતીકાલે PAAS નેતા અલ્પેશ કથિરીયા પણ આમ આદમી પાર્ટીમાં જોડાવવા જઈ રહ્યા છે. અલ્પેશ કથિરીયાની સાથે તેમના સાથી ધાર્મિક માલવિયા પણ AAPનો ખેસ ધારણ કરશે. અલ્પેશ કથિરીયાએ અગાઉ પોતે જ જણાવ્યું હતું કે તેમને ભાજપ, કોંગ્રેસ તથા આમ આદમી પાર્ટી તમામ દ્વારા તેમના પક્ષમાં જોડાવવા માટે આમંત્રણો મળી રહ્યા છે. ત્યારે હવે આખરે તેમણે AAP સાથે જોડાવવાનો નિર્ણય કર્યો છે.