મોરબી દુર્ઘટનાને એક્ટ ઓફ ગોડમાં ખપાવવા પ્રયાસ? જાણો શું કહ્યું ઓરેવા કંપનીના મેનેજર દીપક પારેખે

મોરબી બ્રિજ અકસ્માત અંગે ઓરેવા કંપનીએ કોર્ટમાં નિવેદન આપ્યું છે. જેમણે રિનોવેશન કર્યું હતું. ઓરેવાના મીડિયા મેનેજર દિપક પારેખે કોર્ટમાં કહ્યું કે અમારા એમડી જયસુખ પટેલ સારા વ્યક્તિ છે. 2007માં બ્રિજના પેટા-કોન્ટ્રેક્ટર પ્રકાશભાઈને કામ સોંપ્યું હતું અને કામ સારું થયું હતું, એટલે ફરી તેમને જ કામ સોંપ્યું હતું. અમે પહેલા રિપેરિંગ કામ કર્યું હતું.. પણ આ વખતે ભગવાનની કૃપા નહીં હોય કદાચ તેથી જ આ દૂર્ઘટના બની.

ચોંકાવનારો પત્ર આવ્યો સામે
આ ઘટનાને લઈને ચોંકાવનારો પત્ર પણ બહાર આવી છે. જે ઓરેવા કંપનીએ જાન્યુઆરી 2020માં મોરબી જિલ્લા કલેક્ટરને લખ્યો હતો . એના પરથી જાણવા મળ્યું છે કે પુલના કોન્ટ્રેક્ટને લઇને ઓરેવા કંપની અને જિલ્લા કલેક્ટરની વચ્ચે એક લડાઈ ચાલી રહી હતી. ઓરેવા ગ્રુપ પુલની જાળવણી માટે કાયમી કોન્ટ્રેક્ટ ઇચ્છતું હતું. ઓરેવા ગ્રુપે કહ્યું હતું કે જ્યાં સુધી તેમને કાયમી કોન્ટ્રેક્ટ આપવામાં ન આવે ત્યાં સુધી તેઓ પુલ પર કામચલાઉ સમારકામ કરવાનું ચાલુ રાખશે. તેઓ એમ પણ જણાવે છે કે ઓરેવા ગ્રુપ બ્રિજના સમારકામ માટે સામગ્રી મગાવશે નહીં અને તેમની માગ પૂરી થયા પછી જ તેઓ કામ પૂર્ણ કરશે.