જામનગરમાં દારૂ પીને આવેલા પોલીસકર્મીઓએ ડેન્ટલ કોલેજની હોસ્ટેલમાં ઘુસી વિદ્યાર્થીઓને માર માર્યાનો આક્ષેપ

હોસ્ટેલમાં બર્થડે સેલિબ્રેટ કરી રહ્યા હતા વિદ્યાર્થીઓ
જામનગરની સરકારી ડેન્ટલ કોલેજના કેમ્પસમાં વિદ્યાર્થીઓ બર્થડે સેલિબ્રેટ કરી રહ્યા હતા. આ દરમિયાન પોલીસે ત્યાં જઈને વિદ્યાર્થીઓને અપશબ્દો કહીને તેમની સાથે મારા મારી કરી હોવાનો આક્ષેપ થયો છે. ઘટનાને પગલે મોટી સંખ્યામાં વિદ્યાર્થીઓ જામનગર બી ડિવિઝન પોલીસ સ્ટેશને પહોંચ્યા હતા. અહીં પણ પોલીસ અને વિદ્યાર્થીઓ વચ્ચે બોલાચાલી થતી જોવા મળી હતી. સમગ્ર મામલે વિદ્યાર્થીઓ દ્વારા જવાબદાર પોલીસકર્મીઓ સામે કડક કાર્યવાહી કરવામાં આવે તેવી માગણી કરવામાં આવી છે.

ગર્લ્સ હોસ્ટેલ સામે પણ ગાળાગાળી કર્યાની ફરિયાદ
ઘટના વિશે એક વિદ્યાર્થીએ જણાવ્યું હતું કે, ત્રણથી ચાર વિદ્યાર્થીઓને રૂમમાં સૂતા હતા ત્યાં ઘુસીને માર મારવામાં આવ્યો છે. ગર્લ્સ હોસ્ટેલમાં પણ ગાળાગાળી કરવામાં આવી. તેમાં એકથી બે લોકો ડ્રેસમાં પણ નહોતા અને દારૂના નશામાં ધૂત હતા. અમને દારૂની સ્મેલ પણ આવતી હતી. કોલેજના ડીન દ્વારા સમગ્ર મામલે વિદ્યાર્થીઓ પાસેથી લેખિતમાં ફરિયાદ મગાવવામાં આવી છે, આ બાદ તેઓ ઉચ્ચ અધિકારીઓ સાથે મળી આગળની કાર્યવાહી કરશે.