વડોદરામાં ટ્રેલર અને રીક્ષા વચ્ચે ટક્કર થતા 6નાં મોત, પડીકું વળી ગયેલી રીક્ષાને કાપી મૃતદેહો બહાર કઢાયા

વડોદરા: શહેરના દર્જીપુરા વિસ્તાર પાસે ટ્રેલર અને રીક્ષા વચ્ચે જીવલેણ અકસ્માત સર્જાયો હતો. જેમાં 6 જેટલા લોકોના કરુણ મોત નિપજ્યા હોવાના અહેવાલ સામે આવી રહ્યા છે. જ્યારે વધુ 4 જેટલા વ્યક્તિઓ ઈજાગ્રસ્ત થઈ જતા તેમને સારવાર માટે હોસ્પિટલમાં ખસેડવામાં આવ્યા છે. અકસ્માતની ગંભીરતા જોતા મૃત્યુઆંક હજુ પણ વધી શકે છે.

ટ્રેલરે અડફેટે લેતા રીક્ષા પડીકું વળી ગઈ
શહેરના દરજીપુરા વાયુસેના પાસે ટ્રેલર અને રીક્ષા વચ્ચે અકસ્માત થયો હતો. ટ્રેલર અને રીક્ષા વચ્ચેની ટક્કર એટલી ભયાનક હતી કે રીક્ષાનું પડીકું વળી ગયું હતું. ટ્રેલરની નીચે કચડાઈ જતા 6 લોકોના મોત આ ઘટનામાં નિપજ્યા હતા. અકસ્માતની ઘટના બાદ મૃતકોના મૃતદેહને રીક્ષા કાપીને બહાર કાઢવામાં આવ્યા હતા. મૃતકોમાં ચાર મહિલાઓ અને બે બાળકો સામેલ છે.

એરફોર્સની દિવાલ તોડીને ટ્રેલર અંદર ઘૂસી ગયું
પ્રાથમિક વિગતો મુજબ, ટ્રેલરના ચાલકે સ્ટીયરિંગ પરથી કાબુ ગુમાવતા આ અકસ્માત સર્જાયો હતો. રીક્ષાને કચડીને ટ્રેલર એરફોર્સની દિવાલ તોડી અંદર ઘૂસી ગયું હતું. ઘટનાને પગલે પોલીસનો કાફલો ઘટનાસ્થળે પહોંચી ગયો હતો. માહિતી મુજબ, રીક્ષામાં સવાર લોકો દર્શન માટે જઈ રહ્યા હતા, આ દરમિયાન જ તેમને અકસ્માત નડ્યો હતો.

(વિથ ઈનપુટ: દિગ્વિજય પાઠક)

વડોદરામાં ટ્રેલર અને રીક્ષા વચ્ચે ટક્કર થતા 6નાં મોત, પડીકું વળી ગયેલી રીક્ષાને કાપી મૃતદેહો બહાર કઢાયા

Yogesh Gajjar

Yogesh Gajjar