વલસાડમાં બ્રેક ફેલ થતા પેસેન્જર ભરેલી રીક્ષા ખાડામાં ખાબકી, 2નાં મોત, 8 પેસેન્જર ઈજાગ્રસ્ત

ઢાળ ઉતરતા બ્રેક જ ન લાગી

વિગતો મુજબ, વલસાડના ધરમપુર તાલુકામાં આવેલા રાજપુરી જંગલ ખાતે મુસાફરો ભરીને જતી છકડો રીક્ષાની ઢાળ ઉતરતા સમયે બ્રેક ન લાગતા 10 ફૂટ નીચે ખાડામાં પડી ગઈ હતી. અકસ્માતમાં છકડામાં બેઠેલા 10 જેટલા પેસેન્જરો પણ નીચે ખાબક્યા હતા. જેમાં ગંભીર ઈજાઓ પહોંચતા 2 મુસાફરોના મોત થઈ ગયા, તો અન્ય 8 જેટલા મુસાફરોને નાની-મોટી ઈજાઓ પહોંચતા તેમને સારવાર માટે ધરમપુર સ્ટેટ હોસ્પિટલમાં ખસેડવામાં આવ્યા છે.

પોલીસે અકસ્માતની તપાસ હાથ ધરી

અકસ્માતની જાણ થતા જ પોલીસનો કાફલો સ્થળ પર પહોંચ્યો હતો અને કાર્યવાહી શરૂ કરી હતી. તો મૃતકોને પોસ્ટમોર્ટમ માટે ખસેડવામાં આવ્યા હતા.

(ઈનપુટ: કૌશિક જોશી, વલસાડ)