રાજકોટમાં ભાજપના કાર્યક્રમમાં હોબાળો, સ્થાનિકોએ રોડ-પાણી મુદ્દે MLAની કાર રોકી, મેયરનો ઉધડો લીધો

સ્થાનિકોએ નેતાઓને રોકડું પરખાવ્યું
રાજકોટના કોઠારિયા રોડ પર યોજાયેલા કાર્યક્રમમાં ભાજપના ધારાસભ્યો અને મેયર પહોંચ્યા હતા. ત્યારે જ સ્થાનિક લોકોએ પાણી અને રોડ સહિતના પ્રશ્ને તેમનો ઘેરાવ કર્યો હતો. વીડિયોમાં વ્યક્તિ કહી રહ્યો છે કે, અમારા વિસ્તારમાં રસ્તા અને પાણીના પ્રશ્નો છે. આ માટે અનેકવાર રજૂઆતો કરી છતા કામો થયા નથી. આથી ભાજપના ફ્રી નિદાન કેમ્પના કાર્યક્રમને અટકાવ્યો છે. 3 વર્ષથી રસ્તાઓ ખોદી નાખ્યા છે, પરંતુ રસ્તો બનતા નથી. જે સાંભળીને ભાજપના ધારાસભ્યોએ ચાલતી પકડી હતી.

ધારાસભ્યને કારને થોભાવી
જોકે સ્થાનિકોએ આટલેથી ન અટકતા રાજકોટ પશ્ચિમના ધારાસભ્ય ડો. દર્શિતા શાહની કારને જ અટકાવી દીધી હતી. મહિલાઓએ કારની આગળ ઊભા રહી જઈને ધારાસભ્યને રોકી દીધા હતા. જેનો પણ વીડિયો સ્થાનિકોએ ઉતારી લીધો હતો.