વડોદરામાં ધો.10ની વિદ્યાર્થિનીનું રહસ્યમયી મોત, રાત્રે રૂમમાં સૂવા ગઈ સવારે લટકતી હાલતમાં મળી

અચાનક સગીરાના આપઘાતથી પરિવાર શોકમાં
વિગતો મુજબ, વડસરના મધુ સાગર સોસાયટીમાં રહેતી ધો.10ની વિદ્યાર્થિની પ્રિયા જોશીએ અચાનક આપઘાત કરી લેતા સમગ્ર વિસ્તારમાં ચકચાર મચી જવા પામી છે. સગીરાએ મોડી રાત્રે પોતાના બેડરૂમમાં પંખા સાથે ઓઢણીથી ફાંસો ખાઈ લીધો હતો. સવારે પિતાએ દીકરીને લટકતી હાલતમાં જોતા તેમના પગ નીચેથી જમીન સરકી ગઈ હતી. સગીરાના પિતાના કહેવા મુજબ, તેમની દીકરી ભણવામાં હોશિયાર હતી અને માર્ચ મહિનામાં જ ધો.10ની બોર્ડની પરીક્ષા આપી હતી. દીકરીએ કયા કારણોથી જીવન ટૂંકાવી લીધું તેની પરિવારને પણ જાણ નથી.

પોલીસે આપઘાતનો ગુનો નોંધી તપાસ હાથ ધરી
સગીરાનો મૃતદેહ પરિવારે પંખાથી ઉતારીને હોસ્પિટલમાં લઈ જવાનો પ્રયાસ કર્યો હતો. પરંતુ તેના શરીરમાં કોઈ જાતની હલનચલન ન દેખાતા બાદમાં પોલીસને જાણ કરવામાં આવી હતી. જે બાદ સગીરાના મૃતદેહને પોલીસે પોસ્ટમોર્ટમ માટે મોકલી દીધો છે. હાલમાં સગીરાના પિતાના નિવેદનના આધારે આપઘાતનો ગુનો દાખલ કરીને કાર્યવાહી હાથ ધરી છે.