ખેડૂતોને દિવસે વીજળી મળે તેના માટે સરકાર પ્રયત્નો કરી રહી છેઃ રાઘવજી પટેલે રાજકોટમાં કહ્યું

ખેડૂતોને વીજળી અંગે શું કહ્યું
મુખ્યમંત્રી ભુપેન્દ્ર પટેલની નવી ઈનિંગમાં કૃષિ મંત્રી તરીકેની જવાબદારી સંભાળી રહેલા રાઘવજી પટેલને રાજકોટના પ્રભારી બનાવવામાં આવ્યા હતા. પ્રભારી તરીકેની કામગીરી મળી આવ્યા પછી રાઘવજી પટેલ અહીં રાજકોટમાં આજે શનિવારે પહેલી વખત આવ્યા હતા. તેમણે અહીં ખેડૂતોના પ્રશ્નો અંગે વાત કરતા કહ્યું કે, ખેડૂતોને દિવસે વીજળી આપવા મામલે સરકાર પ્રયત્નશીલ છે અને પ્રયત્નો કરી રહી છે. તેમણે કહ્યું કે હું પણ ખેડૂત છું મેં પણ રાત્રે પાણી વાળ્યા છે. ખેડૂતોને દિવસે વીજળી મળે તે માટે બીજા ફેઝનું કામ ચાલુ છે. ખેડૂતોને દિવસે વીજળી મળી તે માટે પુરા પ્રયત્નો થઈ રહ્યા છે અને તે સફળ થશે.

ખાતરની અછત અંગે રાઘવજીએ શું કહ્યું?
તેમણે કહ્યું કે રાજકોટના આજી રિવર ફ્રન્ટ મામલે તેમણે કહ્યું કે રાજકોટના વિકાસના કામોમાં ક્યાંય કચાસ નહીં રહે. રાજકોટ મહાનગર પાલિકા દ્વારા રિવર ફ્રન્ટનું કામ ઝડપથી શરૂ કરવામાં આવશે. રાજકોટના પ્રભારી બન્યા પછી હું પહેલી વખત રાજકોટ આવ્યો છું અને તમામ વિકાસ કામો ઝડપી શરૂ થશે. તેમણે ખાતરની અછત મામલે કહ્યું કે, ગુજરાતમાં હાલ ખાતરની કોઈ અછત નથી. જે મંડળીઓએ ખાતરની મોડી માગ કરી રહી છે ત્યાં અછત છે પરંતુ ત્યાં ખાતર ઝડપથી પહોંચાડવામાં આવશે.

(વીથ ઈનપુટઃ તેજસ શિશાંગિયા, રાજકોટ)