પ્રજા માટે રાજા ઉતરશે આંદોલનના રસ્તે, ડાંગના રાજા ભાજપ સરકાર સામે કેમ આકરા પાણીએ થયા?

5 વર્ષથી રસ્તો ન બનતા લોકો પરેશાન
છેલ્લા 5 વર્ષથી રાજા ખુદ સોનગીર ફાંટાથી ચીખલીને જોડતો 8 કિમીનો રસ્તો બનવવાની માંગ કરે છે. છતાં કોઇ કામ થયું નથી. તીવ્રઘાટ વાળા રસ્તાને કારણે અનેક લોકો અકસ્માતનો ભોગ બની ચુક્યા છે, ગરીબ આદિવાસી પ્રજાને સમય અને પૈસાનું નુકસાન થઈ રહ્યું છે. જેથી હવે પોતાની પ્રજાની સુવિધા માટે સારા રસ્તાની સગવડ મળે તે માટે રાજા એ ઉપવાસ ઉપર ઉતરવાની ચીમકી આપી છે અને આગામી ડાંગ દરબારમાં મુખ્યમંત્રી અને રાજ્યપાલ ને પોતાના ગામમાં બોલવાની તૈયારી બતાવી છે.

મુખ્યમંત્રી, રાજ્યપાલને રજૂઆત છતા ઉકેલ નહીં
ડાંગના ખરાબ રસ્તાને લઈને ખુદ રાજા અત્યાર સુધીમાં અનેક વખત મુખ્યમંત્રી તથા રાજ્યપાલ સુધી રજૂઆત કરી ચૂક્યા છે. પરંતુ વર્ષોની સમસ્યાનો હજુ સુધી કોઈ ઉકેલ આવ્યો નથી. ત્યારે હવે તેઓ આ ખખડધ્વજ રસ્તાથી સ્થાનિકોને પડતી હાલાકી બતાવવા માટે ખુદ મુખ્યમંત્રી અને રાજ્યપાલને વાસુરણા ગામ લાવીને રસ્તો બતાવવાની તૈયારીમાં છે.