સુરેન્દ્રનગરમાં દલીત સમાજે મણિપુર મામલે કાઢી રેલીઃ કલેક્ટરને આપ્યું આવેદન

સાજીદ બેલિમ.સુરેન્દ્રનગરઃ મણિપુરની ઘટનાને લઈ દલીત સમાજે રેલી કાઢી કલેકટરને આવેદનપત્ર આપી ન્યાયની માગ કરી છે. ઉલ્લેખનીય છે કે મહિનાઓથી મણિપુરમાં તંગદીલી છે. ત્યાં મૈતેઈ અને કૂકી સમુદાય વચ્ચેની માથાકૂટને ત્યાંની ભાજપ સરકાર કે ખુદ દેશના ગૃહ પ્રધાન અમિત શાહની મુલાકાત પછી પણ કાબુમાં કરી શકાઈ નથી. રોજ કોઈને કોઈ રીતે તંગદીલી જોવા મળી રહી છે. એક રીતે કહી શકાય કે મણિપુર સળગી રહ્યું છે, મહિલાઓ પર અને બાળકો પર પણ અત્યાચારની ઘટનાઓ થઈ છે. જેમાં પોલીસની કામગીરી પર પણ આરોપો લાગ્યા છે. પોલીસ પણ નફરતી વાતાવરણને વેગ આપતી હોવાના આરોપો થયા છે. લોકો સતત પ્રધાનમંત્રી પાસે મણિપુર આવવા અથવા મણિપુર મામલામાં દખલ કરવાની માગ કરી રહ્યા છે, પરંતુ ન જાણે કેમ છેલ્લા ઘણા સમયથી મણિપુર સળગતું અટકી રહ્યું નથી તંત્ર પાંગળુ બની ગયું છે અને અહીં નારાજગીની દીવાલ એટલી મોટી ચણાતી જાય છે કે બે સમાજોને ભેગા કરવામાં ખબર નથી કેટલો સમય લાગશે. આ મામલાને લઈને આખરે જ્વાળાઓ ગુજરાત સુધી પહોંચી છે. ઠેરઠેર વિરોધ પ્રદર્શન અને ન્યાયની માગ કરવામાં આવી રહી છે.