ચૈતર વસાવા સામે ફરિયાદઃ આજે ડેડીયાપાડા બંધનું એલાન, મનસુખ વસાવાએ કહ્યું- ‘કોઈએ ડરવાની જરૂર નથી, દુકાનો ખુલ્લી રાખો’

ડેડિયાપાડા બંધનું આહ્વાન

ચૈતર વસાવાના સમર્થકોએ જણાવ્યું હતું કે, ડેડિયાપાડાના આદિવાસી આગેવાન ઉપર ખોટા આરોપ લગાવીને ખોટા કેસ કરીને સમાજના કામો કરતા અટકાવવાનું જે ષડયંત્ર કરવામાં આવેલ છે, જેના વિરોધમાં 4 ઓક્ટોબર 2023ના દિને સ્વૈચ્છિક બંધનું એલાન આદિવાસી સમાજ દ્વારા કરવામાં આવે છે. તો બીજી બાજુ ભાજપના સાંસદ મનસુખ વસાવાએ બજારો ખુલ્લી રાખવાની અપીલ કરી છે.

મનસુખ વસાવાએ કરી અપીલ

સાંસદ મનસુખ વસાવાએ સોશિયલ મીડિયા પર પોસ્ટ કરી છે. જેમાં તેઓએ લખ્યું છે કે, ‘કોઈએ ડરવાની જરૂર નથી. ડેડિયાપાડામાં બધા બજાર ખુલ્લી રાખે, સૌ સાથે મળીને શાંતિ જાળવે અને ગેરમાર્ગે ન દોરાઓ તેવી કાળજી રાખો.’ આની સાથે જ તેઓએ એક વીડિયો પણ શેર કર્યો છે.

કોઈએ ડરવાની જરૂર નથી. દેડીયાપાડામાં બધા બજાર ખુલ્લી રાખે. સૌ સાથે મળીને શાંતિ જાળવે અને ગેરમાર્ગે ના દોરાઓ તેવી કાળજી રાખો pic.twitter.com/v4xZVP1RWQ

— Mansukh Vasava MP (@MansukhbhaiMp) November 3, 2023

શું છે સમગ્ર મામલો?

અત્રે ઉલ્લેખનીય છે કે, એક મારામારીના કેસમાં વનવિભાગ દ્વારા ફરિયાદી બનીને ધારાસભ્ય ચૈતર વસાવા વિરુદ્ધ ફરિયાદ દાખલ કરાવાઇ છે. વનવિભાગની જમીન પર ખેડાણ કરતા આદિવાસીઓના મુદ્દે વનવિભાગના કર્મચારી અને સ્થાનિકો વચ્ચે બોલાચાલી થઇ હતી. જે મામલો ઉગ્ર બન્યો હતો. જેથી વન વિભાગ દ્વારા ચૈતર વસાવા ઉપરાંત તેમના પત્ની શકુંતલા બહેન સહિતના કુલ 8 લોકો વિરુદ્ધ ફરિયાદ થઇ છે. જે પૈકી 3ને પોલીસે ઝડપી પણ લીધા છે.