ખેડા: ધારાસભ્યનો ભત્રીજો બુટલેગર નીકળ્યો, ઘરમાંથી 21 લાખની દારૂની બોટલો મળી આવી

વિગતો મુજબ પોલીસને બાતમી મળી હતી કે, માતર તાલુકાના લીંબાસી પોલીસ સ્ટેશનની હદમાં આવતા ભલાડા ગામે રહેતા વિજય ઉર્ફે પ્રિતેશ પરમારના ઘરે મોટા પ્રમાણમાં દારૂનો જથ્થો ઉતર્યો છે. જેથી LCBની ટીમ ત્યાં તપાસ માટે રવાના થઈ હતી. વિજય પરમારના ઘરમાં રેડ પાડતા અંદરથી 7,140 દારૂની બોટલ મળી આવી હતી. દરમિયાન ત્યાંથી ભાગવાનો પ્રયાસ કરતા વિજયને પોલીસે ઝડપી લીધો હતો. આ સાથે ગોવિંદ પ્રજાપતિ નામના વ્યક્તિને પણ પકડી લેવાયો હતો. બંનેને પકડીને વધુ પૂછપરછ માટે પોલીસ સ્ટેશન લઈ જવાયા હતા.

આમ ખુદ ધારાસભ્યનો ભત્રીજો જ બુટલેગર નીકળતા રાજકીય વાતાવરણ તંગ બન્યું હતું. પોલીસે આરોપી પાસેથી મળેલો દારૂનો જથ્થો ક્યાંથી લવાયો હતો અને તે કોને આપવાનો હતો તે સહિતની દિશામાં વધુ કાર્યવાહી હાથ ધરી હતી.

(વિથ ઈનપુટ: હેતાલી શાહ)