અરવલ્લી જિલ્લા ભાજપ સંગઠનના પ્રમુખ દારુ ભરેલી કાર મુકીને ફરાર થયાના આરોપ: સ્થાનીકોએ ઝડપી દારુ ભરેલી સ્કોર્પિઓ

ભાજપ નેતાનું દારુની કારને પાયલોટિંગ કરતા હોવાના ગંભીર આરોપો
ઉલ્લેખનીય છે કે ચૂંટણીને લઈને ગુજરાતની તમા બોર્ડર પર પોલીસ અને તંત્રની ચાંપતી નજર છે. બીજી બાજુ સ્થાનીક બુટલેગર અને તેમના નેટવર્ક પર પોલીસની સતત નજર હોવાનું જાહેર કરાય છે. છતા ગુજરાતમાં ચૂંટણી દરમિયાન આટલી મોટી માત્રામાં દારુનો જથ્થો લઈ કેવી રીતે કારમાં અવરજવર થઈ શકે? તે પ્રશ્ન ઊભો થયો છે. આ દારુ ભરેલી કારને જિલ્લા ભાજપ સંગઠનના પ્રમુખ પાયલોટિંગ આપતા હોવાનો આરોપ અહીંના લોકો લગાવી રહ્યા છે. બાબતની ભારે ચકચાર મચી જતા માલપુર પોલીસ પણ સ્થળ પર દોડી આવી છે. દારુ ભાજપનો હોવાના અને મતદારોને આપવા લાવ્યા હોવાના ગંભીર આરોપો લગાવાઈ રહ્યા છે. જોકે પોલીસ હવે સત્તાવાર રીતે શું જાહેર કરે છે તેના પર મીટ મંડાઈ છે.

પોલીસની આગામી કાર્યવાહી પર લોકોની નજર
માલપુરના અણિયોર નજીકથી દારુ ભરેલી સ્કોર્પિઓ સ્થાનીકોએ અટકાવી હતી. તેમને મળેલી બાતમીને આધારે તેમણે આ કારને અટકાવી હોવાનું સામે આવ્યું છે. કારમાં સવાર કેટલાક નામી વ્યક્તિઓ પણ ફરાર થઈ ગયા હોવાના આરોપો લગાવાઈ રહ્યા છે. મોટી માત્રામાં દેશી દારુનો જથ્થો હોવાનું સામે આવતા લોકોના ટોળે ટોળા ઉમટી પડ્યા હતા. સ્થાનીક પોલીસ પણ સ્થળ પર પહોંચી ગઈ હતી. પોલીસ હવે કેવી કામગીરી કરશે તે આગામી દિવસોમાં જોવા મળશે.
(વીથ ઈનપુટઃ હિતેશ સુતરિયા, અરવલ્લી)