કચ્છના માંડવીમાં ભારે વરસાદથી અનેક વિસ્તારમાં કમર સુધી પાણી ભરાયા, NDRFની ટીમે 6 લોકોને રેસ્ક્યુ કર્યા

NDRF માંડવીમાં બચાવ કાર્યમાં વ્યસ્ત છે
માંડવીમાં વાવાઝોડામાં સેંકડો વૃક્ષો પડી ગયા હતા. જેના કારણે હાઈવે જામ થઈ ગયો હતો. એટલું જ નહીં, ભારે વરસાદને કારણે માંડવીના અનેક નિચાણવાળા વિસ્તારોમાં પાણી ભરાઈ ગયા હતા. માંડવીના બગીચાબાગ વિસ્તારમાં આવેલી એક સોસાયટીમાં કમર સુધી પાણી ભરાઈ ગયા હતા. જેના દ્રશ્યો આજતક ન્યૂઝ ચેનલ પર બતાવવામાં આવ્યા હતા. આ બાદ NDRFની ટીમ ત્યાં પહોંચી હતી અને 5-6 લોકોનું રેસ્ક્યુ કરવામાં આવ્યું હતું. તો દ્વારકાના રૂપેણ બંદરના નીચાણવાળા વિસ્તારમાં ફસાયેલા 2 લોકોને બહાર કાઢ્યા હતા. NDRF ની ટીમે જીવના જોખમે 2 લોકોને હેમખેમ બહાર કાઢ્યા હતા.

મોટાભાગના રસ્તાઓ વૃક્ષો ધરાશાયી થતા બંધ
વાવાઝોડાના પગલે રાજ્યમાં અસંખ્ય વૃક્ષો ધરાશાયી થતા રસ્તાઓ બંધ થઈ ગયા છે. એવામાં વાહન વ્યવહાર ઠપ થઈ જતા તેને ફરીથી રાબેતા મુજબ શરૂ કરવાના પ્રયાસો કરવામાં આવી રહ્યા છે. સવારથી જુદા જુદા જિલ્લાઓમાં NDRFની ટીમો રસ્તા પર પડેલા વૃક્ષો હટાવવાની કામગીરીમાં લાગી છે. ઓખાના ચોપાટી રોડ પર NDRFની 5 નંબરની ટીમ વૃક્ષો હટાવીને રોડ ખુલ્લી કરાવ્યો હતો.