સોનાના ભાવમાં હજુ પણ વધારો થશે, તહેવારની સિઝનમાં ખરીદી પર અસર નહીં પડે

તહેવારોમાં કેમ સોનાના ભાવ વધે છે?
આવી સ્થિતિમાં તહેવારોની સિઝનમાં દેશમાં સોનાની અછતને કારણે કિંમતો વધી શકે છે. કેડિયા એડવાઈઝરીના ડિરેક્ટર અજય કેડિયાએ જણાવ્યું હતું કે પુરવઠામાં ઘટાડો અને આયાતમાં ઘટાડાથી દિવાળી સુધીમાં સોનાના ભાવ વધીને 53,000 થઈ શકે છે જે હાલમાં 52,000 છે.

આ હોવા છતાં, પીળી ધાતુની કિંમત 2020ની તુલનામાં લગભગ 3,000 ઓછી રહેશે. તે સમયે સોનું 56,000ના સ્તરે હતું. આ સિવાય ધનતેરસ અને દિવાળી જેવા તહેવારોની સિઝનમાં લોકો સોનાની ખરીદીને શુકન માને છે. આ કારણોસર, ખરીદી પર વધુ અસર થશે નહીં.

કિંમતો વધારવામાં ચીન-તુર્કીની ભૂમિકા
આંતરરાષ્ટ્રીય બેન્ચમાર્ક કિંમત સામે ભારતમાં સોનાનું પ્રીમિયમ ઘટીને માત્ર એકથી બે ડોલર થયું છે, જે ગયા વર્ષે તહેવારોની સિઝનમાં $4 હતું. આ બેંકોને ચીનમાં 20 થી 45 ડોલર સુધીનું પ્રીમિયમ મળી રહ્યું છે. તુર્કીમાં $80 સુધીનું પ્રીમિયમ ઉપલબ્ધ છે. એક બેંક અધિકારીનું કહેવું છે કે બેંકો સોનું ત્યારે જ વેચશે જ્યાં તેમને વધુ કિંમત મળશે. અત્યારે ચીન અને તુર્કી વધારે પ્રીમિયમ ચૂકવી રહ્યા છે.

આયાતમાં 30 ટકાનો ઘટાડો
ભારતમાં સોનાની આયાત સપ્ટેમ્બરમાં 30 ટકા ઘટી છે. તેનાથી વિપરીત, તુર્કીમાં આયાત 543 ટકા અને ચીનમાં 40 ટકા વધી છે. મીડિયા રિપોર્ટ્સ પ્રમાણે કેડિયાએ કહ્યું કે, ઓક્ટોબર-ડિસેમ્બર ક્વાર્ટરમાં સામાન્ય રીતે સોનાની ઊંચી આયાત થાય છે. ગયા વર્ષે સમાન ત્રિમાસિક ગાળામાં લગભગ 1,000 ટન સોનાની આયાત કરવામાં આવી હતી, પરંતુ આ વખતે આયાત ઘટી છે.

બેંકો પાસે પણ 10% ઓછો ભંડાર છે
સૂત્રોનું કહેવું છે કે ભારતની મોટાભાગની ગોલ્ડ સપ્લાય બેંકો પાસે એક વર્ષ પહેલા કરતા આ વખતે 10 ટકા ઓછો ભંડાર છે. મુંબઈના એક વેપારીએ કહ્યું કે આ સમયે સ્ટોકમાં કેટલાય ટન સોનાની જરૂર હતી, પરંતુ તે માત્ર થોડાક કિલોમાં જ છે.