’15 પથ્થરબાજોને પકડ્યા છે’ વડોદરામાં રમખાણ મામલે હર્ષ સંઘવીએ કહ્યું

વડોદરાઃ અવારનવાર ઘણા એવા તત્વો છે જેઓ હાથો બનીને કોમી શાંતિને ડહોળી નાખવામાં જરા પણ વિચાર કરતા નથી. આપણી વચ્ચે રાજકારણીઓએ રોપેલા ધાર્મીક ઝેરના મૂળિયા ઘણા અંદર ઉતરતા થયા છે જેને હવે કાઢી ફેંકવાનો સમય આવ્યો છે. ત્યારે વડોદરામાં રામનવમીના અવસરે ફતેપુરા વિસ્તારમાંથી પસાર થઈ રહેલી શોભાયાત્રા પર કેટલાક અસામાજીક તત્વો દ્વારા પથ્થરમારો કરવામાં આવ્યો જોકે આ પથ્થરમારો કેવી રીતે શરૂ થયો તેની કોઈ જાણકારી સામે આવી નથી. હાલ પોલીસે વિવિધ કેમેરા ફૂટેજ, ફૂટ પેટ્રોલિંગ, લાઠીચાર્જ વગેરે કાર્યવાહીઓ હાથ ધરી છે. ગૃહ રાજ્યમંત્રી હર્ષ સંઘવીએ આ દરમિયાન મીડિયા સાથે વાત કરતા કહ્યું છે કે, પોલીસે 15 જેટલા પથ્થરબાજોને પકડ્યા છે. પોલીસ આવા કોઈ પણ કારસ્તાનને ચલાવી લેવાના બિલકુલ મુડમાં નથી તેવું પણ અહીં જોવા મળી રહ્યું છે.